Cathy Campana facci u ritratu d’una figura di u so rughjonu… una vicina com’ùn si ne trova più tantu…
RENÉE
Ci hè ghjente chì hà bisognu d’atti strasordinarii pà mostrà a so ammirazione.
Eiu v’aghju da parlà d’una donna ch’ùn pare fà parte di l’eroi di i nostri tempi ma chì per mè ghjè un mudellu.
A connoscu dipoi più di vint’anni à Renée vistu ch’o simu i soli abitanti d’un paisolu di Bigornu, Petrapola, trè persone fiere di u so locucciu preservatu.
Avemu in cumunu sta passione di a solitudine, apprezzendu ogni minutu u situ scantatu, luntanenza beata è volontaria, surgente di richezza senza prezzu.
Noi, più giovani campemu sottu strada invece chì a regina suprana regna in l’alte cime, hè cusì chì a nostra vicina ci parla da u murettu è ci dà i so belli cunsigli.
Renée hè nata in Calinzana ma hà spiccatu un saltu versu isse Francie, in Marseglia. St’apertura di spiritu l’hà forse acquistata cusì, sottu d’altri celi, luntanu di Cursichella.
Ciò chì mi tocca, ghjè stu cumportamentu di ghjovana allora ch’ella hà festighjatu i so novanta trè anni.
A so discussione, a rapidità di capiscitura, e so tenute, tuttu hè attuale, nunda d’una vechja.
Certe zitellette vintaninche si mostranu più stanche è corcie chè ella.
Ghjè vestuta bè, capelli grisgi ùn ne vole, a pilucchera si spiazza in casa à tinghjelili.
U so manghjà ùn vene da fora ne compru à u trattore o offertu da i servizii suciali, ella scucineghja ogni ghjorni cum’è s’ella avia una grande famiglia à mantene.
Bocchi savurita, u dottore li ricumanda di seguità un regime, tandu li risponde sfacciata : « Èiu manghju bè è dormu bè ! »
Ùn hà micca figlioli, nipoti sì, soprattuttu unu calenzanincu, u s’eredu.
A furtuna di Renée, nata Restitude, hè issa casa intrattenuta incù amore induv’ella s’hè stallata, prima c’un cumpagnu, sola dipoi un quartu di seculu.
Di stintu paisanu, u giardinu u cultivava annu scorsu, u rigretta perchì i so legumi eranu naturali è belli gustosi.
Li dispiace dinò d’avè piantatu di cunduce pochi anni fà, quella vitturetta rossa vitale à chì campa in paese è si vole indipendente.
Avà, ancu di grazia, ghjunghjenu i tragulini à u pede di a casa, li ghjova ancu di divertimentu à Renée, e visite ùn ci n’hè tante !
Ùn hè cunsiderata bigornese, ancu s’ella ci hà frustratu e petre altru chè certi nati in paese.
Èiu ch’aghju trent’anni di menu, li dicu di tù è ci cuntrastu senza vede differenza trà di noi.
Sta donna ci dà una lezziò di vita, a s’andatura hè degna di stima.
Soffre d’isulamentu è in listessu tempu li piace a so pace. Ùn corre dunque appressu à nimu, si cuntenta d’ella stessa cum’è cumpagnia.
Hà un misgiu ch’ella chjama Belle, li si paria ch’ellu fussi femina quand’ellu hè natu. Belle dorme in lettu cù Renée è si ne invechjanu inseme.
In issi paesi corsi, si ne trova persone cum’è Renée chì malgradu l’età, sò sempre affaccendate, ch’ùn vi parlanu ne di vechjaia ne di morte è chì vi mostranu a strada à suvità per campà bè in stu mondu.
Ci vole à aiutà i nostri anziani à stassine ind’è elli, autonomi, un bon’ morale è a sudisfazione di mantenesi à dì per sè valenu più chè tutte e medicine è e case di ritirata di u mondu !
Retrouvez d'autres textes de l'auteur :
Tempu d’elezzione, dopu à u siscu
