Cathy Campana ci rigala trè ritratti, fatti à pinnelli : un’ anima surella, un’ artista ghjucadori di mandolina è unu di i più famosi pueti corsi…
Ritratti
L’anime surelle
Sì statu tantu spiratu
Vistu cum’è un tesoru
Sferente appena natu
Cù li to capelli d’oru
Chè tù n’ai mai tagliatu
Artistu hè lu to lavoru
Ùn avia diciott’anni
Quandu ci simu scuntrati
Spartendu gioia è malanni
Ed inseme ingrandati
Da un filu sodu so liati
Longu à li to cumpleanni
Po meie sò diventate
E to piū grande passione
Ancu quell’ inaspittate
Cù tamant’annigazione
Da tè à mè amparate
In scola di l’affezzione
L’avvene u camperemu
Cum’è anime surelle
Unu à l’altru aiuteremu
In un cuntrattu fidele
A sperenza teneremu
Caru figliolu in le stelle.
Livia-Maria Bartoli 
Aghju scontru una zitella
O cusì bella persona
Li gusta la tarentella
È di mandolina sona
Onore di Cursichella
U so curaggiu vi stona
Cumposta di modestia
Di cunduta miritoria
L’aiuta l’eucaristia
Loda lu Diu di gloria
Nasce prestu l’empatia
Per chì scopre a so storia
Di l’altri gode a stima
À rende cū devozione
Sì sprime ancu in rima
Sà trasmette l’emozione
In corsu sempre la prima
À sparte le creazione
Pregu à Livia-Maria
Un avvene bel’ fiuritu
Podè seguità a via
Di u solcu addulcitu
Benedetta ella sia
Pà u so santu meritu.
Ghjunghju 2020
U Rusignolu hè mortu, qual’hè chì canterà ?
A voce di Rusignolu
S’hè alzata in l’Alta Cima
Di Zilia allitaghjolu
C’incantava a so rima
Corsica porta lu dolu
È li mostra la so stima
Notte in chjam’è rispondi
Quant’ellu ne hà passatu
Cū li so versi fecondi
Musa Corsa sempre à latu
Ghjochi richi è profondi
Ùn ci mancava lu fiatu
À Ghjesū lu so lamentu
L’hà scrittu pà devozione
Sparte cusì u spaventu
Davanti l’abnegazione
Chì stu santu attaccamentu
Li sia benedizione
Pare chì Roccu Mambrini
Cantava cum’è l’ocelli
I parenti è li vicini
Sì sentenu orfanelli
Ma oghj’ùn hà più cunfini
Vola incù l’anghjulelli.
Retrouvez d'autres textes de l'auteur :
Tempu d’elezzione, dopu à u siscu
