Letizia Cosimi manda trè puemi dillicati da assulanà i ghjurnati bughjicosi…
Tù sì...
L’alba d’un ricordu
À smattà un surrisu ch’ogni matina si piglia
Un batellu à u portu
À induvinà u visu ch’omu lascia per via
A vera sinfunia
D’un core à l’ispensata
Tù sì malincunia
D’una stonda straviata
Tù sì...
A veghja d’un rimorsu
Un passu infinitu, una notte chì corre
Versu u tempu scorsu
Un rilogiu smaritu è l’ora chì sì more
Vene a frenesia
Sì sente a vuciata
Chì chjama a malavia
Cum’una serinata
Tù sì...
Un ventu smisuratu
Chì soffia ogni mumentu è chì spia a fine
È l’amore cacciatu
À cantà un lamentu appesu à e cime
Cum’una puesia
A vita hè attempata
Si pregha l’armunia
Per una rima amata
Tù sì...
Cum’un fiore sbucciatu
L’acquata matutina, u sole à l’attrachjata
Un sonniu tralasciatu
À stridà u vaghjime, l’inguernu addisperatu
Vene a nustalgia
D’un tempu arrubatu
A vita hè magia
U giru hè firmatu...
Di quale si l’amore?
Da l’alba à la bughjata
Senteraghju u dulore
Un sicretu innumatu
Chì ferma in lu mio core
Stu ricordu zuccatu
Chì mai ùn si po more
Un veru prigiunatu
Di quale si l amore ?
A vita hè attempata
È u tempu Chì corre
Mi conta à l’attrachjata
Un veru batticore
Chì a sorte lampata
Mi tomba à tutte l’ore
Un veru prigiunatu
Di quale si l’amore ?
Li mio versi impiegati
Ùn anu amarore
Anu persu lu fiatu
Cantanu à l’albore
L’amore cundannatu
Tenenu u calore
Un veru prigiunatu
Di quale si l’amore?
Un mumentu arrubatu
Chì mi face discorre
Cù l’alma addisperata
Ne sentu lu rimore
Lu to passu liatu
À u meiu in core
Un veru prigiunatu
Di quale si l’amore ?
Per sempre canteraghju
‘Ssu lamentu chì vole
Campà à lu to latu
Senza cuntà ne fole
U destinu hà pichjatu
Lu mio core hè in dolu
Un veru prigiunatu
Di quale si l’amore ?
D’inchjostru è di mele...
Vi cunteraghju a fola
Chì m’annega sta matina
Quella di l’apa chì sola
Face nasce quì vicinu
Lu so mondu in lu so volu
L’apa madre hè a prima
Volta è gira ogni ghjornu
È po ferma à a cima
Cù l’ernaghju à l’ascosu
Ma ghjè ella sta Regina
Chì dà l’ordine in prosa
È u bugnu cume rima
L’essame hè sempre chjosu
Cantanu à l’improvisu
Cù l’inchjostru spaventosu
Senza mandà un surrisu
I favi so generosi
U mele dà lu so visu
Po cù le so mani dolci
Vene ammassà a matina
Lu so fruttu maestosu
D’un versu chì dice in fine
Chì l’apa maravigliosa
Hè un cantu à u ravisu...
