Tittò Limongi ci rigala un puema pà u ritornu di u veranu...
Panni veranili
I chjarasgi in vestitu biancu
Signureghjanu i spazii
Per riceve i ringrazii
Di l’umanu à sguardu francu.
Ogni tuttu hè cupertu
D’un celente à tinte azure
Duve e rondine sicure
Vanu in un volu espertu.
A cullana fatta d’oru
È da rasgi, è da fiori,
Allusinga i culori
Incredibule ristoru.
I campestri luminelli
È le fate pratelline
Sanu stende e cunfine
Cusì simplici ghjuvelli.
S’addurmentanu i fiumi
Si disceta a virdura
Si rinnova a natura
Mez’à gioia è prufumi.
In le machje tepidose
U sussuru di i cacci
Vi si pare tanti abbracci
Stonde à vene generose.
Quale hè ch’ùn sente i gridi
Armuniosi è canterini
Favulosi è cristallini
Di parechji è dolci nidi.
Per risparghje i so spanni
D’un incantu propiu arcanu
Veste prestu u Veranu
Tutti i so più belli panni.
u 13 d’aprile di u 2020
