Cathy Campana scrive in rima i malanni d’oghji…
O chì tempi maladetti
O chì tempi maladetti
O chì tempi d'addisperu
U siscu sott'à li tetti
Scalatu da lu strangeru
È noi li poveretti
Ci murimu di penseru
Quelli di l'informazione
Li ride ancu lu culu
À issa ghjente in perdizione
Imbriachi d'accumulu
Gran'cunsigli d'abluzione
Iscia stu porcu emulu
Tutt'attività s'arresta
U tempu ferma suspesu
Finitu di fà la festa
Guasi tuttu ghjè difesu
Forse in a volta celesta
U nostru Diu hè offesu
Vulimu i lindumani
À la sorte adasgiata
Ripiglià l'usi anziani
È compie la mascherata
Sbasgiulassi trà cristiani
Senza fane un'insalata.
L'omu pridadore
U Signore hè un pittore
A natura la so tela
Da a notte à l'albore
Pinghje è po' u ci svela
St'opera di creatore
Sfassa tutta cheruvela
L'omu ghjè un pridatore
Chì ruina issa natura
Ùn fermerà manc'un fiore
S'ellu tene a s'andatura
Di Diu micca timore
Per l'altri poca primura
Forse venerà u ghjornu
Di a presa di cuscenza
Videremu u ritornu
Di l'ottima providenza
Serà dolce u suggiornu
Dopu tanta viulenza.
Pour lire d'autres textes de l'auteur
Piccula pezza di teatru scritta avanti u cunfinamentu
