Piccula pezza di teatru scritta avanti u cunfinamentu - Cathy Campana

Cathy Campana ci rigala una passata bastiaccia…

Piccula pezza di teatru scritta avanti u cunfinamentu

Simu in una grande salla bianca, dodeci persone scrivenu attavulinate. Arriti, una donna è un omu parenu dui professori in faccia à elevi. Entre una donna l'ochji sburlati, i capelli incirlitti.

« Scusatemi, ci hè un problema tamantu ! »

Tutti alzanu u capu è fermanu à bocca aperta.

« O la me sorte, o povera à mè, a sapia ch'ùn ci vulia micca à fà st'attellu di scrittura oghje incù ciò chì si passa, avà aghju da perde a mo piazza è diventà anch'eiu una disimpiigata, finì "fosciata" allora ch'avà so éiu a direttrice di l'Alboru, u teatru u più "sciccu" di Corsica ! »

 Mischjava u corsu è u francese da tantu ch'ella era spaventata !

« Vogliu sempre fà piacè à tutti ma avà sò ruvinata, ohimé, mi ne morgu, "je suis foutue" ! »
L'omu, u professoru, s'avvicina d'ella è li dumanda di calmassi è po' vole sapè ciò chì si passa, cosa hè sta catastrofa chì face perde u capu à Jocelyne, una bella donna abitualmente calma è gentile.

« Lasciatemi corre, ùn v'avviccinate di mè à dui metri è soprattuttu finite di stupami adossu, serete forse voi à avè u cosu, u "pornovirus", rinculatevi ancu di trè metri ancu, fatela per piacè, aiò !

                  — In più di què, tossate, nò ? »

Quand'elli sentenu parlà di virus, tutti s'alzanu cume impazziti, e carreie volanu in a pezza, si feghjanu unu è l'altru in caterrochju per ch'anu capitu chì forse ci n'hè unu ch'hà qualcosa ch'ùn và.

Ci vole à sapè ch'hè ghjunta da fora una pandemia, cumencia à pena avà in Corsica. Certe manifestazione sò permesse è d'altre interdette. A cundizione per chì parechji si ritrovinu inseme in un locu chjosu era d'accetà di fà un'analisa dui ghjorni nanzu.

Venianu d'annuncià à a direttrice chì c'era un sbagliu in i risultati, ch'unu di i participanti avia u coronovirus è ch'ella stessa era cunsiderata cum'è rispunsevule di stu guaiu.

Tandu, e manere, da distinte ch'elle si facianu tutta a mattinata, cambianu da u dì à u fà è e faccie diventanu u spechju di u terrore risenttutu.

A direttrice annunzia chì l'Albore, cusì si chjama u locu di a tragedia, hè messu in quarantesima, dunque chjosu à cadena è in più, ùn ci hè nunda ne per beie ne per manghjà !

Certi, i più grassi diventanu accaniti perchì a paura di fermà famiti i rende cattivi, anu più timore di pate a fame chè forse, di stu virussacciu chì scimisce à tutti.

L'altri, s'allontannanu unu di l'altru è provanu à fà in furia in furia una spezia di maschera per provà di salvassi.

A direttrice pienghje quant'ella pò è mughja piuttostu ch'ella parla
« U primu ch'o vecu tossà saperaghju ch'ellu hè stu tisicacciu chì ci hà da fà more tutti, ancu di fame, ghjè ellu chì c'intisichisce allora ch'eramu tranquilli cum'è battisti. »

A tendina chjove a scena, i spettatori sentenu u rimusciu di sti corsi impazzitti chì si lampanu nant'à a povera direttrice per tombala à colpi di carreie.

Cathy Campana