Dimmi l’amore / Più che tuttu, ci sì tù - Franck Castellani

Un coppiu di puesii mandatu dà Franck Castellani da illuminà i ghjorni bughji… Dimmi l’amore è Più che tuttu, ci sì tù.

Dimmi l’amore

Dimmi l’amore tamantu
L’armunia di e cose belle
Ind’è l’ochji chì lucicanu
È riscaldanu u core !

Dimmi l’amore putente
L’abbracci appassiunati
Pieni di focu è di sole
Chì purtanu l’avveni !

Dimmi l’amore chì nasce
Sott’à un celu d’argentu
Quandu i mani inseme
Si sfiuranu pianu pianu !

Dimmi l’amore vincitore
È scrivillu annant’à i muri
Da quì à e stelle, dillu forte
Fà tesori tutti l’istanti !

O musa mea
A mo fata cara
Dimmi u verbu
Chì ribomberà
Stonde di magia
À lu mondu dinù
Rughja à l’infinitu
Per a vita a passione 
E fulate di scimesca
L’allegria forte !

Più che tuttu, ci sì tù

Più chè u mare d’oliu
À a punta di u mo rifugiu
È ch’ a machja u cantu
Chì risponde, ci sì tù !
Ci sì tù !

Più chè u sole cullatu
Chì riscalla u corpu
Ch’ un ventu sparnusatu
Cum’è un basgiu, ci sì tù !
Ci sì tù !

Più chè tutti i paradasi
Di e stelle è di i belli lochi
Chì sò spessu mille tesori
Tù, mi tendi e mani
Mi tendi i mani.

Più chè tuttu, ci sì tù
Sintinellu luminosu
Quandu l’avvene hè scherzosu
È scimisce lu mondu
Scimisce lu mondu.

Sì tù davant’à me
Cum’è falla si valè un fiore
Di centu culori vivi
U mo bellu amore
Chì di mattina nasce
Alluminendu l’orizonti.

Franck Castellani