Eccu dinò dui puemuchji mandati da Tittò Limongi, scritti in tempu di sarratura...
Da core à core
À quella nebbia pagna
Chì à spessu t’avvinghje
Cun la so forma stragna
Chì ti piglia è ti stringhje.
À quellu tempu scemu
Chì corre è ti strascina
Mandendu più d’un tremu
À l’alba canterina.
Feremu di manera
À porghjeti chjarura
Da chì a stonda nera
Scambiessi di versura.
Feremu di manera
Chì nant’à u to visu
Nascessi in una spera
Un picculu surrisu.
Circheremu a parte bella
Chì sà porghje l’imbellita
Per dì chì ghjè sempre quella
Chì incende a to vita
À quellu sole persu
Daretu à nivuloni
À u to sognu immersu
In l’ansciu di e stagioni.
À quella manu chjosa
Chì s’apre appenuccia
À sta strada ritrosa
Induve un fiore sbuccia.
Tittò, u 13 d’aprile di u 2020.
***
Inseme dumane
Ci seranu stonde amare
È un celu grisgiu assai
Serà grisgiu ancu u mare
Ma tù tandu ùn cappierai.
Vulteranu torna chjare
Ste ghjurnate chè tù sai
Ci seranu stonde amare
Ci seranu stonde care.
Ripigliu :
È dumane sparteremu
Senza teme
È dumane anderemu
Torna inseme
Inseme
Ci seranu tempi scuri
Chjosu tuttu u nostru ingiru
Trà ciò chì seranu muri
Truverai u to rispiru
Omi è donne in sti sussuri
Chì meritanu l’ammiru.
Ci seranu tempi scuri
Ci seranu tempi azuri.
Ci seranu ore strane
Un rillogiu irreale
Quì, e mani guardiane
Moveranu senza uguale
Quì, e voci isulane
Diceranu : universale
Ci seranu ore strane
Ma sicuru, un dumane.
Tittò, u 13 d’aprile di u 2020
Pour lire d'autres textes de l'auteur :
