Marianghjula Antonetti-Orsoni

U rigalu

 

Bellu rigalu ! U fioccu rossu sarà prestu disfattu da e maniole chì presentanu u rigalu. Cusì bellu issu frisgettu rossu orlatu da puntini bianchi, ci sarebbe guasi voglia d’ùn tuccallu ! Ma spiccemuci, aprimu… Purtantu avia dettu ch’ùn vulia nunda per u mo nataliziu !  Ùn face nunda, mi lasciu fà… Quale sarà chì hà sceltu a cullana ch’avia vistu ind’è a vitrina di l’orèfice, ùn n’avia purtantu dettu nunda à nimu ; quale sarà chì l’averà sappiuta ? Ma nò, ùn era micca una cullana ! Forse cicculate ? Mi ne liccava capunanzu di quelle ganasce savurite.

Ma ùn era chè un mirasgiu ! U rigalu era smarritu à la lesta è ùn vedia più chè u celu russighjente chì annunziava acqua o ventu.

Cum’è una statua annant’à a so stalca, fighjava u luntanu fumaccicosu induve elli si spechjavanu l’ultimi ragi di u sole. Era attempu in u paisaghju è attempu u guardava ; mi strughjiva incù a natura. Sentia ch’o pudia piglià a mo alzata in volu è andammine versu spazii luntani. Sottu à a volta di vitrame graticulatu, u viotu mi purghjiva e bracce ma ùn avia micca u curagiu di lampammi versu e nebbiure culurite.

D’un colpu isse fumacciule smarrinu è s’aprì una porta annant’à un grande spaziu spampigliulante. Issu purtone di legnu massicciu induve i decori eranu stati fatti da bancalari d’arte attalentati dava annant’à un paradisu. Era stata stallatu annant’à un muru di mattoni rossi, di quelli chì si ghjova omu per tene u calore. Al di là di a porta, tuttu ùn era chè friscura è chjarore… u verde è u giallu supranavanu.

S’era cambiatu di stagione.

Perchè isssa porta s’era chjosa d’un colpu ? Tuttu ridivintava bughju. Ma quale era issa persona chì avia a capacità di mutà e stagione ? U bellu spaziu culuritu era affattu smarritu. Cumu ritruvà issi belli culori veranili ? Era pò d’esse in un sognu ? Bugulava à buleghju e stagione passendu da u biancu à u negru, da u chjaru à l’oscuru, à u culuritu à foscu.

Ma quale era issu omu ? Era forse quellu chì avia cumpratu u rigalu cù u cusì bellu fioccu rossu ? L’ampararebbe prestu. Avia a manu annant’à  a manechja è a porta ùn starebbe tantu à apresi.

Quand’ella s’aprì fù un bellu caffè fumicante ch’o scuprì. Induve si truvava omu ? In una bibbiuteca ? Un salottu di tè ?

U fume chì scappava da a tazza avia scacciatu e nebbie culurite è i ragi di u sole. S’alzava sopra à u tavulinu induve un libru lasciatu cusì cù negligenza aspettava un lettore. Avia u tantarolu di guardà u titulu ma sarebbe statu veramente ragiunevule ?  È perchè isse duie tazze ? Forse un’ altra persona m’aspettava in issu spaziu ? Era per andà à sfuglittà i libri infilarati annnant’à u parastasgiu quandu chì un rimore mi fece trasaltà. Ci fù cum’è un accendita è pò tuttu smarrì. Più caffè, più libri, più parastasgi.

Ci era avà grande purtelli invitrati è spazii chjari chì davanu annantu a cità. Dui magnifichi futtogli d’un biancu virginale aspettavanu… Mi sarebbe piaciutu à pusacci, ma temia ch’elli ùn smarriscanu elli dinò. Cum’ellu era smarritu u rigalu, cum’elle eranu smarrite e nebbie culurite, cum’elle era smarritu u paisagiu risplendente di chjarore, cum’elli eranu smarriti u caffè… è i libri.

Ùn sapia più cosa pensà !

Averaghju sunniatu, ùn la sapia più. E stagione eranu passate cusì in furia. Saria sempre pussibile di ricusà u rigalu ?

 

 

  Avis aux lecteurs

Un texte vous a plu, il a suscité chez vous de la joie, de l'empathie, de l'intérêt, de la curiosité et vous désirez le dire à l'auteur.e ?

Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message ! 

 

Nous allons continuer de grandir, éloignée l’une de l’autre par ce quotidien qu’un jour nous ne passions qu’ensemble. Nous devrons aller au travail, faire des courses, nourrir nos enfants. Mais, comme aujourd’hui, je continuerai de t’appeler, pour rire simplement. Comme aujourd’hui, nous partirons à deux hors des vies bien rangées, pour vivre une belle épopée. Je ne sortirai pas mes fesses du grand train de notre amitié. On ne se perdra pas.

Nouveautés
Decameron 2020 - Le livre
Article ajouté à la liste de souhaits