Ghjambattista Giacomoni - Vitaè

    

Amore di a vita, vita data à l’amore… Una supplica di Ghjambattista Giacomoni

 

 

Vitaè

  

(A vita hè ancu qualchì volta cusì : stradata à l’allera, di l’amore aspessu delusa malgradu a cerca sempiterna d’ognunu. Trà l’amore, quellu chì si «face» è l’Amore, quellu chì luce, spartutu, ind’i cori, ci hè un bellu passu à fà…)

  

Addiu vita cagna

à sempre ghjimbà spinu

quì solu u ventu si lagna

di l’achetti di u pinu

ormai cantu cuccagna

riverdisce u mo destinu

 

In lu boscu verde niellu

e lacrime sò di rasgia

seguitu u mo pasturellu 

chì hà tastu a mo chjarasgia

è chì in ogni scurnarellu

dunde mi stracquu ellu mi basgia

 

E mo vele fora tutte sò

à u sbalargu

vocu nant’à i novi stradò

di l’azardu

 

Pocu mi preme l’usu

neppuru guasi u lozzu

pocu m’importa u sisu

quandu l’aghju à spallozzu

solu vecu in lu so visu

tuttu u piacè ch’o accozzu

 

S’eo mi dò ellu mi piglia

è s’ella li piglia torna mi dò

correnu e mani nant’à l’iglia

mentre ch’à le labbre di bombò

beiu u suchju di maraviglia

chì mi porta in pinzagliò

 

E mo vele fora tutte sò

à u sbalargu

vocu nant’à i novi stradò

di l’azardu

 

Ma vulerebbe tantu chì à stonde

ellu mi cerchi in fondu à l’ochji

induve si pesanu l’onde

chì ciambottanu e mo certezze

minaccendu e mo sponde

ch’ellu mi cerchi in fondu à u core

induve venenu à more

e frezze

ch’ùn sò quelle di l’amore

Vulerebbe esse l’ombra ghjelosa

di sognunu di i so passi

è micca solu a cosa

à coglie

da scuzzulassi

vulerebbe ch’ellu mi rispiri

esse a rosula di i so suspiri

l’ellera ciccica avvinta

à u so muru amante

l’arburu insetaghjolu

di u fruttu dolce amaru

di u ti tengu caru

 

 … di u ti tengu caru.

 

 

 

Avis aux lecteurs

Un texte vous a plu, il a suscité chez vous de la joie, de l'empathie, de l'intérêt, de la curiosité et vous désirez le dire à l'auteur.e ?

Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message !

 

 

Nouveautés
Decameron 2020 - Le livre
Articles les plus consultés
Article ajouté à la liste de souhaits
Product added to compare.