Soffiu di sè / Soffiu di tè - Tiger-Lily Keyser

Dui puesii prufunde cum’e lamenti, dolci cum’e nanni, da Tiger-Lily Keyser.

  

  

Soffiu di sè

 

Vita, strada longa di ricordi ma corta in u tempu

 

Quandu u celu risplende di luce, in pienu mese d’aprile

L’acelli chì volanu senza sapè induv’elli si n’andò

Di quellu paese di cuccagna, locu d’acqua è d’amore

Una zitella si perde in sognu, in ricerca di l’altrò

Cerca sempre à sguassà u passatu, l’avvene

A so forza per andà di più luntanu, aiò

Lascia ti purtà da u to imaginariu ! Quante dulore

T’hai da suppurtà, in fine per capì chì innò

A vita ùn face mai rigali… ma po esse

Un veru piacè… amichi, famiglia ùn ti ne scurderà

Chì anu viaghjatu cun tè, longu u fiume di u to destinu…

 

 

Sò una ghjuvanotta sempre in ricerca d’identità

Sò dilusa di a ghjente è di u mondu induve no campemu oghje

Ma in u mo core famiglia è amichi di a mo vita

Contanu di più, m’aiutanu à nantu a mo strada

di quella sò, è di quella serà

 

 

Sempre affacendata, ùn hà tempu per sè...

Ma un ghjornu si pianta una siconda

Guarda in giru à ella, si perde in l’urizonte

Vede a bellezza di a natura, di a vita,

 

Pensa à eri, à oghje, à dumane.

Un ghjornu senza lindumane

Spera d’esse quallà luntanu

In i so bracci, à Ellu.

 

Pianu, pianu ripiglia

A trama di u so caminu,

Senza dumandà à nimu

nunda ne mancu l’ora…

 

 

Ogni muntagna attippata

Ogni siconda trimata

Ti porta versu l’avvicinera

Di u benestà

Ùn ti pianta mai

Chì darretu sta cima quì

Curagiu è forza t’aspettanu sai

Mai più listessa serai...

 

  

Quì mi sò ingrandata

Sò cresciuta, cascata.

Aghju vintu assai

Ma ne aghju persi

Rumore ci ne serà

Ghjenuvesa era

Ma casa mea sì

 

 

Quale era, quali sò, quali serà

Ùn ci deve sà quale sè

Pè sapè duve ti ne và

T’inchietà i to pedi ti purteranu

Quallà sopra à e muntagne

Chì, una sola vita averà

Allora campa la

 

 

A to sfarenza hè a to sperenza

Ghjè quessa a to bellezza

Fiore cusì singulare

Culore ùn ci ne pare

Sola ind’è issa machja salvatica

Per quessa scuperta mitica

Un soffiu tenneru

È un core liberu

 

 

~~~

 

 

Soffiu di tè

 

Destinu caru

Si terribule sai ?!

Amore, Dulore

Mai unu

senza l'altru

Veru

Si vede ind'è e

mane

a vita di ognunu

Ma streghe

u filu tagliate lu

ma ellu lasciate lu,

in u nostru

Core...

 

 

 Acqua pura

Sole dolce

Arba fresca

Core d’amore

 Mumentu efemeru

 Ricordu eternu

 

 

Zitellucciu sunnieghja,

In brama d'una vita

Di maraviglie.

Ma ùn si scurderà,

 Chì più luntanu quallà

Guai, si piattanu…

 

 

 Legnu di vita

Soffiu eternu

 Mane quassu

Core quallà

 

 

O Anima dolce è pura,

Induve si, induve vai ?

Ind'è quess'arburu maestosu

O puru in l'acula quassu

A scelta sarà toia.

Sò chì u sole ci serà

 Pensu à tè

Pensu à mè...

Ventu portà mi quallà

Versu à a Libertà

 Natura fà lu entre

Ci videremu sempre

 

 

Una notte senza stelle si ne scurdò

Neru foscu, sera di miraculi

Un silenziu pisivu ma chì si purtò

Ind’è i so sogni i più splendenti

 

Neru foscu, sera di miraculi

Animali noturni ballanu ind’è a notte

Ind’è i so sogni i più splendenti

Si hè persu attraversu u fiume di maraviglie

 

Animali noturni ballanu ind’è a notte

Ùn pensendu à nunda

Si hè persu attraversu u fiume di maraviglie

Lasciendu si purtà

 

Una notte senza stelle si ne scurdò…

 

 

A mio luce

Splendore di u mo core

Maraviglie di i mio ochji

Spiritu arancinu d’amore

Mai senza tè à l’attrachji

Dì mi, aurora di libertà

Tù chì ti lasci purtà incù u ventu

Dà mi a to sperenza

Pè cuntinuà ind’è issu mondu

Senza tè…

 

A mio luce

 

 

L'ore chì sì guardanu cum'è ind'è un spechju

U sole chì luce dopu à una ghjurnata difficiule

A morte chì sguilla trà e to dite fragile, suttile

Pruttezzione di a malamorte, ùn sentu muchju

Issi segni indefiniscevuli 

Framezu e stelle è i niuli

Issi missaghji d'esodiu

Di 'ss'anghjulu custodu 

 

 

Quandu pensu à tè

 

O ventu porta mi quallà

Framezu l’arburi è l’animali

Cusì maestosi, cusì libari

Senti a mo brama di libertà

Senti a mo vulintà

 

Quandu pensu à tè

Aghju l’ochji lacrimanti

Quandu pensu à tè

Cercu à tene i mo pienti

Cercu à ritruvà i nostri surrisi

 

A mela di u mondu

Sarà a vita, sarà a morte

A sai chì tù devi sceglie

Ùn ti lasciu andà quassu

Ùn mi lasci quì da solu

 

Quandu pensu à tè

U tempu si ne và in altrò

Quandu pensu à tè

Porta u sonu di u pianò

Porta mi qualla o scimitò

 

In a mio mente

Serai sempre ghjovanu

Infeniscevule stu mumentu

Senti u battimentu di u mo core

Senti, quandu pensu à tè

 

 

Ochji sbrillati, u core strintu

Ti vecu quassu framezu e stelle

Cusì è per sempre ghjucondu

Perch’è ùn s’hè micca statu accantu à mè

Anghjulu custodu tù serà 

Avia vulsutu fà benestà

 

 

 

Avis aux lecteurs
Un texte vous a plu, il a suscité chez vous de la joie, de l'empathie, de l'intérêt, de la curiosité et vous désirez le dire à l'auteur.e ?
Entamez un dialogue : écrivez-lui à notre adresse decameron2020@albiana.fr, nous lui transmettrons votre message !
  
  
  
Article ajouté à la liste de souhaits
Product added to compare.

Le site Albiana.fr utilise des cookies pour la gestion de votre compte client et suivre l'audience (sans suivi individuel).