Sfurtunatu - Brandon Andreani

Brandon Andreani da u so locu di ritirata, c’invia ssu puema d’unu « sfurtunatu » sì, ma spiritosu…

Sfurtunatu

Basta ch’e dicissi neru par chì tuttu fussi biancu
Quand’e cercu u scarpu drittu cascu sempri nant’u mancu
S’e vogliu andà in Bunifaziu mi ritrovu in Antisanti
Mettu a marchja in daretu, partu subbitu in davanti

S’e vacu à u magazenu par pigliammi i belli frutti
À a clienti chì sorti l’ultimi i l’ani vinduti
Quand’e pigliu a ghitarra è ch’e facciu dui accordi
Mancu una siconda dopu, saltani i sei cordi

Sì u tempu hè di statina, vi ni possu dà a prova
Mettu un solu pedi fora, subbitu si metti à piova
Vogliu rifalà in cità, tuttu hè bluccatu chì neva
Aghju da piglià u battellu : c’hè dui mesi di greva

Faci un fretu chì si secca ma hè compia a ghjurnata
Vogliu piglià una duscia : ùn c’hè chè acqua cutrata
Mi fighjulu un bellu filmu maravigliosu, putenti
Hè appena cuminciatu : mi tagliani u currenti

Vurriu cuntinuà è davvi tutta a lista
Di ciò chì và di traversu in sta vita un pocu trista
Ma sò obligatu à compia, ancu s’eiu sò dispostu
A sfurtuna ùn pianta mai : avà mi manca l’inchjostru…