Apparizione / Ficaghjola - Ghjuvanni Dal Colletto

Depuis Marseille, Ghjuvanni Dal Colletto envoie, in lingua corsa, deux poésies ravivées par la nécessité de l’instant… comme un baume.

Apparizione

In duie rime sgalabate

Prestu cumposte è accunciate

Eccu sta piccula sturietta

Chì sempre oghje mi turmenta

Sò pastore di mistieru

È da sempre ne sò fieru

E mo capre à la pascura

Chjamà le possu una à una

Un bellu ghjornu d’Aprile

Fù ind’è lu miò casgile

Chì la vidì a prima volta

Affaccassi à la miò porta

Di li so ochji lu turchinu

Mi lasciò cum’un cininu

Ch’ìnd’a matina natalesca

Abbacciacatu infiara l’esca

« Da muntagne incurunatu

Eiu libaru sò natu

Ma per tè bella signora

Possu ligà mi nanta l’ora »

‘Ssa dumanda era scimizia

Sperava solu a s’amicizia

Ma fù cusì chì la deessa

Diventò quì la miò prumessa

È pè lu chjassu di l’amore

Vidia nasce un nov’albore

Quandu

Mi discitendu à manu roza

Bàbbu fece smarì la sposa.

F I C A G H J O L A

L’amicu ANNARELLA u primu l’hà cantata

Fendu cunnosce à tutti a famosa  falata

Di lu nostru carrughju hè la bella figliola

Eccu di San Ghjiseppu a nostra Ficaghjola

Custì si sò spannate e nostre zitelline

Essendu pè piscà à ‘sse chjare matine

O ricòglie acqua fresca in qualchi buttigliola

Eccu di San Ghjiseppu a nostra Ficaghjola

Mamma cù li no panni à spessu ci falava

Cù quellu battulellu à l’Ochju i ci lavava

Cantendu riculava in capu a so paghjola

Eccu di San Ghjiseppu a nostra Ficaghjola

Da i giòvani d’avà à li nostr’antenati

A mez’à li so scòglii quant’amori sò nati

Ghjè custì chì nascì a mea a famigliola

Eccu di San Ghjiseppu a nostra Ficaghjola

Ancu s’è oghje ghjornu ci vene lu stradone

Chì sò belli spariti Paradisu è Scuglione

L’amore hè sempre qui pè la nostra piaghjola

Eccu di San Ghjiseppu a nostra Ficaghjola

È dipoi tant’anni à l’ottu di settembre

Purtata da noi altri Ella s’affaca sempre

Pè la nostra Madonna a fede hè campaghjola

Eccu di San Ghjiseppu a nostra Ficaghjola                         

Ghjuvanni Dal Colletto