Cathy Campana - Babbone, un banditu d'onore

Babbone, un banditu d’onore

A mo mamma, quand’eramu chjuchi, si facia volenteri narratrice.

I spettatori l’avia sottu a manu, i so sei figlioli. Di televisiò ùn si ne parlava ancu. 

Eiu, zitelluccia, ascoltava è ritenia. Oghje, e so parulle fermanu stampate in capu pà u sempre.

Mamma, era passiunata da parechji tema.

Ci n’era chì li tenia à core, l’evocazione di a vita d’un omu fermatu pà ella una leggenda, u so corciu babbu.

Antone Cortesi ùn avia micca avutu una vita semplice.

Prima di diventà un babbone di i più affettuosi, era statu unu di quelli ch’omu chjamava in Corsica, banditu d’onore.

À s’epoca, in 1870, i Corsi si facianu a ghjustizia à di per elli, c’era pocu à aspettà da l’autorità francese.

Hè cusì chì stu giovanu, calmu, senza storie, s’hè credutu obbligatu di tombà per difende u s’onore.

Campendu in una piccula cumunità, lascià si mancà di rispettu riprisentava tandu a morte sociale.

L’omu avia l’obligazione di fassi la à valè, un pocu cum’è in issi western visti à u sinemà.

Antone Cortesi campava in Sant’Andria di u Cutone, un paisucciu acciucciulatu di Castagniccia.

Era capimaestru, curava i ghjurnatanti sott’à i so ordini.

L’autorità era un appoghju tremendu per Antone, ùn pudia lascià passà nunda.

Un ghjornu l’ordine cascò nant’à unu chì li ne vulia.

Invece di fà ciò chì l’era chersu, l’omu rispose per dispettu : « Tù sì una merda ».

Antone fissò st’adversariu inaspettatu è li disse cù a calma.

« Veni di parlà mi d’una manera ch’ùn possu accettà. Sò pagatu per curavvi è tù mi volli inghjulià dinanzu à tutti. Ti lasciu a pussibilità di pente ti di ste parullaccie, mi ne vò duie ore, quandu ritornu t’aghju da pone una sola quistione. Videremu sè t’ai cambiatu d’avisu. »

Duie ore dopu a risposta di l’omu à Antone fù listessa.

À à sorpresa generale, tandu Antone pigliò u fucile è fece fallà u ribellu à i so pedi.

A so sentenza era stata appiecata subbitu subbitu, senza nisun’ tribunale.

Per ùn andà in prigiò, Antone pigliò a macchja è cuminciò una vita di banditu strazziata è piena di periculi mortali.

A contava à veghja, quand’ellu avia a barba bianca, di st’annate passate in issa machja à guardà si di i gendermi, à pate mille miserie. 

E giovanotte di u paese chì andavanu à coglie e legne, temivanu di scontrà u banditu Cortesi. E sentia quand’elle ne parlavanu, spaventate. Ellu allora, si piattava per ùn fà li paura. 

Era un veru banditu d’onore, micca cum’è quessi chì nucianu à a ghjente è prufittavanu di a so situazione per cumportà si in omi di forca.

Per salvà si, Antone Cortesi si n’era andatu sin’à l’America, un paese strasordinariu à l’ochji di stu paisanellu.

Eppoi ghjunse quellu ghjornu induve s’hè messu in manu à a ghjustizia, forse sapendu à l’avanza chì e so pene li serianu rimesse per via di prescrizzione.

I gendermi l’anu fattu dorme in "un lettu di piume". Tant’anni dopu ùn si n’era mai scordatu di stu cunfortu scunnisciutu.

Secondu mamma, u so babbu ùn averia mai fattu prigiò.

D’altre persone m’anu ripetutu quantu i so paisani rispettavanu à Babbone.

Stu babbone bellu tranquillu chì si n’hè andatu à finì a vita incù a famiglia di a figliola, mamma, in Canale di Verde.

Caru babbone, ùn t’aghju mai vistu, sò nata dopu, quand’è tu durmive in campu santu, ma ti tengu caru è sò fiera di tè ! L’amore hè natu cù issa trasmissione da mamma à figliola. Stu picculu scrittu hè un umaggiu ch’o ti vogliu fà, cù tant’affettu.

Avis aux lecteurs

Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message !