Marianghjula Antonetti-Orsoni - A Direttrice

  

Quelques souvenirs de l’École Normale d’Institutrices d’Ajaccio dans les années 60. Par Marianghjula Antonetti-Orsoni.

 

 

A Direttrice

  

Quandu ch’o sentu a parolla « direttrice », ghjè sempre in core u ritrattu di a mo Direttrice di E Scole Normale chì mi vene in core. A chjamavamu « Madame ».

Ùn la vediamu cusì aspessu ma quand’ella affaccava à vede e « so nurmaliste », ognuna si dumandava ciò ch’ella avia da rimpruverà ! Per u più quand’ella venia, ghjeranu rimbecchi o lagnanze ; è  noi trimavamu. « Ch’avareghju fattu ? Ma chì ci sarà ?... »

Ùn ci era bisognu di sbattaglià chì ghjera sempre ella chì avia ragiò !

Una volta, mi n’arricordu, m’avia chjamatu in u so scagnu ; mi dumandò quale era chì mi mandava issu libracciolu ch’ella tenia in manu è perchè quella pagina era marcata ? Ghjera un numaru di "Sélection du Reader Digest".

- « Ùn la socu, Madama a Direttrice, ma s’è vo vulete, a puderaghju dumandà à mo zia chì travaglia  ind’è E Poste in Parigi è chì aspessu mi manda cartuline quandu chì a ghjente si ne scorda di mette l’indirizzu ».

Mancu u tempu di risponde mi chì m’avia digià dettu d’andà mi ne in ghji scola. 

A inchiesta era stata fatta in furia ! Ùn ci vulia à circà à zagannà…

À l’internatu, ghjeramu guasi cum’è in una caserna ; ùn surtiamu chè u ghjovi, chì tandu ghjera issu ghjornu di vacanza prima d’esse u marcuri, è a dumenica. U ghjovi, un’oretta, u tempu di cumprà un pezzu di savone per lavà si è qualchì altru affarellu per a simana. A dumenica, una stonda a mane : quessa ghjera per pudè assiste à a messa ; ma noi ùn ci andavamu, preferiamu à fà ci dui passi annant’à U Corsu. U dopu meziornu, ci vulia chì u nostru currispudente venissi à circà ci è purtà ci prima di sei ore. Ùn aviamu chè timore chì nimu ùn venga ! Campu chì Jeanine è François, i mo paisani è amichi chì stavanu in Aiacciu avianu accettatu d’occupà si di mè… Chì campa ! Osinnò mi tuccava à stà mi ne in scola è cullà mi ne à u Salariu incù u gruppu di quelle chì ùn surtianu : à chì ghjera punita, à chì nimu ùn era venutu à circà.

Una caserna… A si saperà un cucinu di u paese, Ghjacumu, marinaru in Tulò, ghjuntu in Aiacciu à nant’à un battellu di guerra. Quand’ellu affaccò à u purtone di A Scola Normale per dumandà à vede mi, u purtinaru ùn li dedde mancu u tempu di parlà : « Les matelots ne sont pas admis dans cette école ». Pensate ! Ùn ci eranu chè giuvanotte ! A vista di u « pompon » l’averebbe fatte scimì !

A Direttrice ella, ùn si facia tantu vede ma so presenza a sentiamu quantunque ogni mumentu. Ùn aviamu chè paura di vede a porta apre si è sente ci chjamà per un rimproveru. 

L’ultimu annu, l’annu di furmazione d’insignante, ci dava i corsi di pedagugia è di murale prufessiunale. Mi n’arricordu di quelli spechjali attunduliti ch’ella tenia in punta di u nasu ; è dinò di quelli « hum » di narbosa, surtiti da e nare o da a cannella, ùn si sà,  quand’ella s’infiarava. Tandu ci tuccava à stà ci tracche. Ebbe cusì un accessu di còllara un ghjornu quand’ella ci parlava di libri di murale è ch’o li mustrò un libru di murale cristiana. Ohimè !... Ma induve saraghju andata à circà lu issu libru ? Ma da induve mi sarà venutu ? Mancu ùn la sò, ma ciò chì mi resta in memoria hè ch’ella s’hè rizzata cum’è un fulmine è ch’ella si n’hè andata da a sala di scola  incù u mo libru… Ùn si n’hè mai più parlatu, di quellu libru ; tantu peghju per mè ! Si sà chì a laicità ghjera un affare primurosu per ella !

Una volta, una nurmalista l’avia datu una lettera per fà una dumanda di surtita. Per tutta risposta : « Écrire Madame la Directrice avec un petit d ! Quelle honte ! »

È di quessi i stalvatoghji, ogni normalista di tandu ne puderebbe cuntà.

Un pezzu di cutone cascatu da a finestra di u durmitoriu, è tuttu e sculare d’issa stanza eranu punite. Una vesta messa annant’à e spalle senza infilà e maniche : una punizione. Cascavanu cum’è pinnacciuli in inguernu !

A Direttrice, stava incù u babbu, cusì bravu omu, in l’appartamentu di funzione di a Scola normale. Ella ùn s’era mai maritata ; u so travagliu, un veru sacerdoziu. Per ella, ùn ci era chè què chì avia un sensu.

Ghjera una donna di cultura, d’una grande cunniscenza è d’una manera di parlà chì mi meravigliavanu. Si sentia tutta a so finezza di spiritu, tutta a so sapienza, tuttu u so sale ma solu quand’ella decidia ella.

Una donna chì ùn pudia lascià insensìbule. A so primura maiò ghjera quantunque di vede riesce « e so nurmaliste » à tutti l’esami è tutti i cuncorsi. È quessa ùn li la pudiamu rimpruverà d’avè tanta primura di nostru avvene… 

Si primurava ancu di a nostra vita intima è quandu no eramu per finisce i nostri studii è avè un postu per issi paesi, ci avia fattu una cacciata chì ci era parsa strana : « Méfiez-vous des beaux électriciens qui se détachent dans le ciel bleu ! » 

Sottu à l’armatura di ferru, ci era quantunque un core di donna di bè è una sensibilità di prima trinca.

 

 

Avis aux lecteurs

Un texte vous a plu, il a suscité chez vous de la joie, de l'empathie, de l'intérêt, de la curiosité et vous désirez le dire à l'auteur.e ?

Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message ! 

 

Nouveautés
Decameron 2020 - Le livre
Article ajouté à la liste de souhaits