Marianghjula Antonetti-Orsoni - Ritrovature

Ribombanu i ricordi di la ghjenti cara quandu si ritrova u paesu… Marianghjula Antonetti-Orsoni

Ritrovature

Ritrovu u muscu di u paese à l’ora veranile

Colmu di culori spampigliulanti.

Ritrovi u calore di l’amichi di giuventù

Lasciati tempi fà, agguaiati dopu à to partenza.

Ritrova in u scornu di a so mente

I visi di l’antichi svaniti in i nuli.   

Ritruvemu i chjassi inturchjulati

Di a memoria smenticata.

Ritruvate l’ore appese à u celu

Chì filanu cum’è l’acelli spapersi.

Ritrovanu u soffiu di u tempu

Chì corre cum’è u ghjargalu muntagnolu.

È s’ellu ùn era chè un sognu 

Chì cunghjughucava  issi ritrovi à tutti i tempi !

 Avis aux lecteurs

Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message !