Tante Niny, une centenaire pleine de vie partie en 2019, a laissé à Marianghjula Antonetti-Orsoni une foule de souvenirs et… un parfum d’éternité.
Apollonie
« Apollonie, un P, deux L », ripeteva aspessu quand’ellu si ammentava u so nome chì parechji u struppiavanu. Nimu ùn la chjamava Pullonia puru s’ellu era cusì ch’ellu si dicia u so nome in corsu.
I più giovani, in paese è ancu altrò, a chjamavanu tata Niny è l’altri, Niny o Apollonie.
Cesari Apollonie nata Arrighi, si n’hè andata u 7 di nuvembre di u 2019… Quattr’anni digià…
Avia centu è un annu. Era nata guasi à a fine di a guerra di u 14.
Lisette, un’ amica di a casa di ritirata induve ella passò i so ultimi anni, ci ne parla incù affezzione.
À u mumentu di a so partenza, hè cusì ch’ella ci parla d’ella :
« Aghju avutu a furtuna di cunnoscevi, cara tata Niny. Grazia à voi aghju fattu scuntratu una bella è grande famiglia ; è per quessa, vi ringraziu o Apollonie…
Aghju preziatu a vostra presenza dinamica, u vostru caratteru interu vuluntariu, u vostru spiritu risentitu, a vostra persunalità, a vostra intelligenza. Ghjerate, cara Apollonie, spuntanea, franca, generosa , ribella, piacevule. Stava à sente cù interessu maiò e vostre riflessione, e vostre riturnelle, i vostri parè lìbari, e vostre parolle forte, a vostra finezza di vista, a vostra visione di i fatti.
Aghju spartutu i vostri ricordi è ricullatu u tempu incù voi.
Parlavate aspessu cù felicità è fiertà di i vostri nipoti, niputini, cum’è s’elli eranu i vostri figlioli, figliulini…
Avete da raghjunghje per u sempre u vostru caru paese di Nuceta, affiancata cù amore da i vostri, purtenduvine incù voi i vostri intimi secreti.
Vi ne andate à un’ età avanzata ma meravigliosa. Tuttu hè passatu cusì in freccia…
Tuttu ciò chè vo mi cuntàvate ballerà in i mo ricordi cù tennerezza è ammirazione. »
Ghjera cusì tata Niny…
Una donna incù un caratteru forte ; dicia à ognunu e so quattru verità.
Ghjera a più chjuca di a so famiglia. I genitori avianu avutu ottu figlioli, sei maschi è duie femine. Dui maschi eranu morti chjuchi è ella ùn l’avia micca cunnisciuti. Li s’era fermatu quattru fratelli è una sola surella ch’ella tenia cusì caru.
Da giovana era stata in Parigi chì a so famiglia si n’era andata quallà à travaglià è l’avia fatta vene à fà studii. Vulia entre in una scola di chìmica ma hè venuta a guerra è ùn hà micca pussutu piglà issa via. « Era bona in inglese », dicia. Averebbe ancu pussutu studià issa lingua ma dopu ha fattu un’ antra scelta è si n’hè vultata in Corsica. Avia quantunque avutu u so Brevettu elementariu è tandu averebbe pussutu fà a stitutrice. Ma hà passatu u cuncorsu di e Poste è ghjè custì ch’ella hà fattu carriera. In Aiacciu, à a direzzione, in Bonifaziu, induve ella tenia u scagnu è l’ultimi anni in Bastia, Lupinu è Posta Centrale.
Ghjera una donna di chjesa cum’è tante altre di quella èpica. A messa tutte e dumeniche è di sicuru per tutte e feste. Ùn ne scagliava manc’una è sopratuttu micca a San Paulu, festa patrunale di u so paese di Nuceta. U tenia caru quellu paese ; ci passava tutte e so vacanze quand’ella travagliava è dopu à a ritirata, ci stava parechji mesi da Pasqua à I Morti.
Quand’ella parlava d’ella dicia : « D’esse chjuca, ùn m’hà mai disturbatu. Sò chjuca ma ben prupupuzionata ». Hè vera chì puru essendu chjuca ghjera una donna ch’ellu si rimarcava da a so eleganza… Mettia sempre cullane, annelli, bracciuletti è sopratuttu pendine originale ch’andavanu cù i so vestiti. Scarpi, sacchi è guanti sempre in armunia incù i so panni. Avia un picculu pede è li era difficiule di calzassi ma si sbrugliava sempre per truvà belli picculi scarpi à tacchetti, ch’ella cummandava per u più in Parigi, di u culore vulsutu. Ùn ci vulia à fà sbagli di gustu !
Maria, creatrice di Casanera li fece a dedica d’un prufume dettu « Apollonia » cusì definitu :
« Un parfum exceptionnel pour tante Apollonie, comme un poème subtil et poudré pour une femme élégante, très avant-gardiste pour son temps. Des pousses de genévrier, une délicieuse odeur du bois d’iris s’allie à la carotte sauvage et le miel avec une touche finale de vanille. Original et très féminin. »
Cosa si pò dumandà di più ?
Tata Niny ci lascia un bellu ricordu è un odore d’eternità…
Avis aux lecteurs
Un texte vous a plu, il a suscité chez vous de la joie, de l'empathie, de l'intérêt, de la curiosité et vous désirez le dire à l'auteur.e ?
Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message !
