Cantu nustrale

 
Quatrième de couverture

In u 1981 escìa Cantu nustrale, un' antulugìa nata in primu da un prugettu pedagògicu, quellu di prupone testi corsi per un insignamentu chì avìa principiatu di manera offiziale qualchì annu prima.
Quelli chì anu campatu u Riacquistu s’arricòrdanu e lotte di Scola

Corsa per chì u corsu fussi ricunnisciutu cum’è lingua regiunale, integrata in a lege Deixonne è insignata in scola.
Ci volse à aspettà vintitrè anni, da u primu ricusu di l’Assemblea naziunale, in u 1951, sinu à u so accunsentu in u 1974.

Un passu era fattu ma ùn c’era nisun materiale pedagògicu. Micca libri di grammàtica, nè racolte di leteratura, ancu menu mètudi audiurali per amparà a lingua… Solu, per furtuna, quelle beate Intricciate è Cambiarine di Pasquale Marchetti è Dumenicantone Geronimi, esciute in u 1972, chì ci stradàvanu nantu à i chjassi cumplessi d’un’ urtugraffìa cuerente.
Ma cumu tene l’attenzione di quelli pochi sculari di nostru, da 5 à 6 ore di sera dopu à una ghjurnata di scola ? Fubbe u cantu à purtacci à salvamentu. U ripertoriu ? Quellu di i dischi. Carlu Rocchi, Antone Ciosi è i Fratelli Vincenti, pè u toccu d’attualità di tandu : U campanile di San Ghjuvà è U mio mulinu, L’Ombre è Casa Paterna, Chì fà è U Tragulinu…
Per sfurtuna ùn èranu stampati indocu issi testi è noi, insignanti, stàvamu à sente u discu, ne cupiàvamu e parolle à a manu nantu à i « stencils » è ne facìamu a ripruduzzione cù a « ronéo » di i cullegi è licei… Ah, era nanzu à Gutenberg.

Hè tandu ch’ella mi vense l’edea di fà edità unepoche di quelle canzone, puntelli piacenti è ùtili di lingua è di cultura. Scopre in mùsica vucabulariu è urtugraffìa, cunghjucazioni è strutture grammaticali, usi è studiu di a sucetà, ma chì tante abbazìe di Teleme ? Accantu à noi u puverettu di Rabelais era un azizone !

Da prugettu mudestu à princìpiu, una racultuccia ghjuvativa per quelli chì c’èramu lampati in l’abissi di a furmazione piuniera, l’òpera pigliava l’abbrìu strada facendu. " Fà una racolta impurtante, mèttici dinù u tradiziunale ", cunsigliò Pasquale Marchetti, " À mè mi piacerìa à vèdeci figurà a mùsica, chì sinnò ùn hà nisun sensu » m’avertì Ghjacumu Thiers, « L’arregistramenti di i canti niulinchi, i ti dò eu », mi prupunì Francescu Flori. Èramu nù a manesca, ùn si pudìa più andà indietru. Durò qualchì annettu a ricerca, è po ci volse à truvà i musicanti per scrive e partizioni… À a chjama di Scola Corsa di Bastia, dìssenu sùbitu di sì Filice Quilici è Rubertu Girolami chì fècenu, u primu a trascrizzione di u tradiziunale, u segondu, quella di u mudernu. Ùn mi scordu d’Isabella Casanova, Guidu Dongradi è Francescu Berlinghi chì elli, èranu digià impignati in l’associ culturali.

Eccu chì nacque Cantu nustrale, stampatu in Curbara, à a Gutenberg sta volta ; nù u frattempu avìamu francatu i sèculi è l’Accadèmia d’I Vagabondi di Tonì Casalonga avìa buscu una stamperìa cù i so caràtteri di piombu. Eh, chì cridite ? A racolta era turnata antulugìa, un mischju d’antica tradizione, di canzone più nove è dinù di spressione indiata chì in pochi anni era sbucciatu u tempu di u cantu pulìticu. Canta u Pòpulu Corsu ne era u soffiu. A memoria c’ellu facìa rinvivisce venìa à sustene u spìritu patriottu è nascìanu i canti di rivolta. C’era divìzia di gruppi canterini ch’infiaràvanu i petti. L’èpuca era di ribellione è pocu dopu dinù di ripressione. U discorsu di Beirut di Ghjiseppu Stromboni, l’Affare d’Aleria, e prime azzioni di u Fronte paisanu di Liberazione… ùn stètenu tantu à falà e baterchjate.
Cantu nustrale ci vulìa ch’ellu si fessi u testimone di e lotte.

U libru spechjava l’eri è l’oghje, rispundìa à tutte e brame canterine, e nustàlgiche è e rivendicative. I Corsi ci truvètenu e so memorie andate cantendu i sonnii di l’avvene.

A classìfica di i canti fù quella di a vita : i temi puètichi ordinati da a nàscita à a morte, da a nanna à u vuceratu passendu per l’innamuramentu, felice o infelice, u travagliu, e feste è u scherzu, i lamenti varii, di banditi o pè a morte di l’animali. Si fece dinù, quant’è pussìbule, in l’òrdine crunulògicu di cumpunimentu di i canti. Ristampatu in u 1983 da u Centru Regiunale di a ducumentazione pedagògica, sottu à l’auturità di u rettore Antone Ottavi, di u cuurdinatore pè l’insignamentu di u corsu, Ghjacumu Fusina è di u rispunsèvule di e publicazioni à u CRDP, Santu Casta è distribuitu nù e’ scole primarie è segundarie, u libru fece qualchì rimusciu in l’istituzione. À’ certi capistabbilimenti dispiacque a parte indiata è ricusètenu di fallu figurà in i CDI (centri di ducumentazione è d’infurmazione). Dispiacque dinù à qualchì elettu è u rettore Ottavi mi cuntò parechji anni dopu ch’ellu ci avia ghjucatu u postu.
Oghje, ancu sì internet prupone parolle, partizioni è mùsica per ben parechje canzone, Cantu nustrale hè sempre dumandatu à i libràrii. Scole di cantu, cullegi è licei, amatori cèrcanu st’antulugìa chì ferma un pezzu di a nostra memoria è u testimone di u militantìsimu d’un' èpica. Di siguru, certi canti ùn anu francatu l’anni, ma tandu era a participazione d’ogni gruppu à a mossa ch’ellu ci vulìa à salutà.

U ristampemu tale è quale, una, per fedeltà à un ducumentu oramai stòricu è duie chì, cun Mighele Raffaelli, avemu intavulatu un' altra òpera più maiò, intitulata Antulugia di u Cantu nustrale. Più sviluppata, bislingua è presentata cù un C.D. di e mùsiche, porghje una visticata più cumpletta di u cantu corsu chì l’arregistramenti di Filice Quilici è quelli di Wolfgang Laade, ùn l’avìamu tandu. Per avà sò esciuti trè vulumi nantu à i nove previsti, dui altri sò pronti è aspettemu e pussibilità d’edizione per cuntinuà stu travagliu.

E sole mudìfiche chì sò state fatte quì, dopu à a currezzione di l’ùltimi sbagli trovi quì o quallà nù e prime edizioni, sò l’indettu di l’incalcu (o accentu tònicu) – nuvità cuntestata ma chì trova spessu a so utilità – è, pruposta da l’editore, a nutazione di l’accordi per facilità l’accumpagnamenti di i ghitarristi, cumplementu assai bramatu da i giòvani.

Èccuci, speremu chì sta nova stampata garberà torna à i lettori, ch’ella serà ùtule à canterini è musicanti è ch’ella ghjuverà à a cunniscenza, u salvamentu è u spannamentu di u nostru patrimoniu musicale è literariu.

Ghjermana de Zerbi