Your cart
Il n'y a plus d'articles dans votre panier
Quatra di cuprendula
Scalu
Date mi i visi è i carrughji,
Date mi isse fantasime chì filanu,
Senza retta nè fine…
Date mi l’ochji tanti è i zitelli,
Date mi i cumpagni
È l’amichi à millaie
Ch’o pigli appellamanu…
Date mi isse vicende,
Battelloni pisii
Di parte è di vultà,
A so storia chì batte
Di fanga è di fumaccia…
Date mi e stagione ardente
È i vaghjimi folti
Di e parolle nove…
Date mi a ghjente
È date mi u cantu,
U ribombu chì volta da i celi,
U muscu d’ogni stonda sciolta,
Nantu à a pelle…
Date mi isse vicende
Di passighjate notte,
Di luce bianca è finta,
Torna una volta...
L’autori
Autora-cumpunitrice, interprete, puetessa è cumediente, Patrizia Gattaceca hè un’attrice culturale maiò. Impegnata da giovana giovana in a mossa di u Riacquistu, l’artista instrada a so opera trà puesia è musica, splurendu l’anima umana ind’è un’isula senza cunfine di tempu o di spaziu, un’isula sempre ri-inventata in u puema. U so chjassu artisticu hà pruduttu un opera sustenziale.
Seranu puesiole ? racoglie testi di cinque dischetti di l’autora, ne prupone e traduzzione è, in u filu di Cantu in mossa (Albiana, 2016), interrugheghja nantu à a leia chì esiste trà puesia è cantu da sempre, un passa è veni chì palesa a dificultà à definisce l’appartenenza definitiva à un generu. Eppuru, cù a so forma o puru i so prucedimenti, u cantu ùn pò pretende appartene à u campu pueticu ?
