Va è fatti leghja

 
Quatrième de couverture

Era abbastanza raru ch’eddu si ghjintrissi in a tana di Quilicchini. Spessu, si cascava annantu à calchì ditagliu for di prupositu chì rumpia u sintimu curiosu d’essaci ghjà ghjuntu.

Prima, c’era l’indirizzu : issa stretta Calabraga, diserta. Avia sciuvaratu Quilicchini di ficcacci a so agenzia nun tantu pà a so tupunumia scatulogica ma nanzituttu parchì ùn s’era incruccatuci nisciun cummercianti. Vicinu à u Pussy Cat, chì l’insegna cinnulava a nuttata sana (puru di ghjornu), ambiu più parodicu, ùn ci n’era.

Dopu, c’erani issi scali chì cuddavani ratti ratti, scali à fà scappà, di sicura, trizzinendu ad ogni passu, po issa porta, in legnu anch’edda, incù issu : 

Quilicchini, Littori

scrittu in grisgiu ed acciaghju annantu à un vetru slucidatu.

Sunatuci, si ghjintria in un picculu curridori à goditi diversi, un baddettu, un antru curridori, una porta, una lavandaria è, infini, franca un’ultima porta, si sculinava un paghju d’espadrigli biculori, à tummara nera è pittili biancu, è un pezzu d’ochji abaraculatu daretu à spichjetti à vetru tradoppiu : Quilicchini.