Ci n'arricurderemu

Strattu

Ogni tantu facìa un muvimentu scuntrullatu. Stringhjìa in a so manu a pàgina di un quaternu di scola basi vèrgine è a stracciava à pezzi è à bucconi prima d’arrizzà si è di fà passi è veni in a stanza, parlendu à voce alta una stonda. È po s’avvidìa di a so cundotta tonta è tandu si pusava  dinò è, mursichendu si e labbre, capizzava è rifiatava per ritruvà a calma è impastughjà a so mente à a realità. Ùn pudìa tene cusì dui minuti sani fin’à ch’ella vultessi senz’astru quellu odore di u sangue siccatu.

Quessu l’odore, stava per amparà la Ghjuvanni, ùn sparisce mai. S’appiccica à a mente cum’è a pece nantu à i panni. Si piatta ind’è u ventu di u ricordu è, spessu spessu, e sere di solitùdine è di tristezza, torna à quellu chì l’hà annasatu una volta sola è ricummencia à stuzzicà li di rimorsi è di rigretti.

L'autore

Pasquale Baldovini, natu u 23 di maghju di u 1989 in Aiacciu, hè crisciutu in u circondu di a cità imperiale è di u so golfu di splendore. Hè nativu di u paese di Vizzani à mezu à e muntagne è i pini maestosi. Hà fattu i so studii di dirittu è po di scenze di l’educazione in Corti. Riesciutu à u cuncorsu di Prufessore di e scole bislingue in u 2015, oghje hè in postu in Fiumorbu .

Ci n’arricurderemu hè u so primu rumanzu publicatu. In u 2018 hà fattu a racolta puetica Rughji è chjuchjulimi (Albiana-CCU).