U contu di i mille è unu motti

Quatrième de couverture

A storia, a cunniscite tutti, cari mei. Scerazada cuntava, cuntava, da ch’ellu ùn sazii mai u sultanu. Ogni sera, da scampassi una morte prumessa, u lasciava in alitu, a narrazione suspesa à quellu culmine chì accatizzava a so brama è esigia un attempu sempre rinuvellatu à a grazia di u lindumane. Pianu pianu, ghjornu per ghjornu, li riescì à ammasgiulà u principe spietatu è, à capu di mille è una notti, si fece accettà da sposa ideale.

Bona, ma u talentu di Scerazada, ci vole à arrizzassi à bon’ora per avellu ! È inventà ogni sera una passata da pudè… cuntà fin’à mille è unu ; mille è un motti, risposte è burle, ci vole à chjamassi Grossu Minutu, ci vole ! A vidite spuntà, voi, a chimera : u figliolu spirituale di a più gran capifulaghja urientale è di u più gran folicapone corsu, mmh mmh ! A fasgiana persica nant’à un purusangue arabu è u sumerinu incarnatu nant’à un fasgianu bazzicone, umbah ! (Umbasti !) (Ùn basti !)

(Strattu di a premessa)

Cumu si ricunnosce u sposu impenseritu da a moglia ?
Si face e corne per ùn purtalle.

Chì dissenu i Russii quand’ellu affaccò Napulione cù i so cannoni in a so capitale ?
In Mosca chjosa ùn ci entre bocca.

Perchè ùn ghjunghje più à arrizzassi un omu chì sgoia à guardà u mundiale di ballò ?
Perchè stà in u so foot oliu.

Chì hè u mottu di James biondu ?
Per a Regina, ci vole à falu !

Chì diferenza ci hè trà u telescopu è u durmiglione ?
U primu hè tuttu di punta nant’à l’astru ; u segondu hè tuttu u dì nant’à l’astrapunta.

Chì hè u colmu per un cappellaghju ?
Di fassine accuncià a paglietta.