Your cart
Il n'y a plus d'articles dans votre panier
Extraits
O sè vo sapissite o cari ! Sè vo sapissite e ciarlate, e burlate, e sciabulate, e scaccanate, e sbillicate, e spanzate chì nascianu daretu à quelli purtelli. Chì tante ghjelusie ! À palesu ! Nant’à a piazza, per ste strette, in campagna, in u piacè di u cummunu, chì ùn vale a risa s’ella ùn hè spartuta. A risa hè parolla chì sguilla, sfunghje, spalanca, si tramuta è si tramanda franchendu ogni fruntiera. O quant’ellu ne curria storie ridicule, strucciuli spiritosi, canzone in disprezzu, raconti saliti è dolci campazioni ! Una pratica naziunale, un’arte maiò, una filusuffia di vita, a intelligenza suprana d’un razzinu rudu ma scherzittosu, industriosu ma cuccagnone, altieru ma ironicu. À chì sà ride d’ellu stessu si franca ogni travata. A magagna, stu sebbiatu populu corsu, a maneghja dapoi l’alba di u mondu !
(strattu da l’introitu)
