Your cart
There are no more items in your cart
Quatrième de couverture
Comu fà mai in quiddu curridori bughju, quiddu speci di minucciu, strettu chì ci vò di veda, incù stu flussu chì vi porta, vi scuzzula, vi strascina da tutti i canti ? Comu fà mai quand’è vo sapeti natà quant’è minnanna, è chì ognunu hè quì daretu à vo à briunavvila : và, và, và, tocca à tè !
Criditimi puri : a si corri bedda brutta, in a so vita, u spermatosoidu.
Alziculeti, vi deti di rimenu, pruveti à risista, ma ùn hè propiu da nudda. V’impunta razza di fiumara ch’eddu andarà Cristu à ritena.
A natura, i mezi po l’hà da cunvinciaci. In quant’è à l’efficacità, ùn aghju nienti à dì.
Difatti, sò pochi à sapè ch’è una squatra di spermatosoidi hè avvizzata. Induva l’omu vedi un istintu, una mossa chì ùn si pò spiigà, si tratta di un’urganizazioni pinsata è ribattuta. Capinnanzi, tutti quant’è no semu, semu presi in manu. Taroccu ùn ci n’hè ; una armata vera, incù issa regula assuluta : disciplina ed ubbidienza. Ci sò capurali, sarghjenti, tinenti, capitani, cummandanti, culinneddi è parechji ghjinirali da astradacci è cunduciaci. È no quì indrentu, semu, s’è vo vuleti, razza di commandò.
Par asempiu, in u me battaglionu à mè, pà intrinacci (era l’eserciziu) erami disposti com’è una squatra di ballò. U capitanu ci daghjia à tutti una piazza scelta ad accupà ed una missioni bedda chjara : ci tuccava ad imaghjinà ch’è no erami in cori di un istadiu, incù l’unicu trifulu di ficcà un ballò in i gabbii di l’avvirsariu. Da almanaccà a so strategia, issu capitanu s’era ancu missu in capu di dacci i noma d’unipochi di ghjucadori famosi : c’era Pelé, Platini, Beckenbauer, Ronaldo, Zidane, parechji altri ch’è ùn cunnoscu, ed ancu u tintu di Claudiu Papi. À mè, m’era toccu Maradonna.
Premiu di a Culletività territuriale di Corsica 2012.
