Liste des produits du fournisseur Guerrini Filippu

Natu di maghju di u 1952, Filippu Guerrini, di Rispuchjani, hè insignante specializatu. Titulariu di un DEA annantu à « e figure di u fantasticu in l'imaginariu è u discorsu corsu », hà u scopu di perseguisce una tesa annantu à u teatru corsu. Cumediante dapoi parechji anni di a compagnia « I Stroncheghjetta », hà participatu à i scontri internaziunali di teatru d'Olmi Cappella sottu à a direzzione di Robin Renucci. Hà ghjucatu incù u Teatrinu Tutti in Ponte Novu di Ghjacumu Thiers è La demande en mariage di Tchekhov addattata in lingua corsa da Dumenicu Antone Geronimi. L'emu vistu à u sinema in u telefilmu Les déracinés di Jacques Renart è vene di compie un filmu di Nicolas Lamberti Corte Malaise chì serà prisintatu di dicembre di u 2002 à u festivale di u filmu mediterraniu di Bastia. D'altri prugetti di filmi sò in ballu. D'altronde, hà scrittu assaghji, puesie, è nuvelle in parechje riviste o giurnali isulani : U ribombu, Corsica infurmazione, A Gravona, A scuzzulata. Hà cantatu è sunatu incù i gruppi L'arcusgi è Diana di l'Alba è hà scrittu à tempu persu parolle di canzone.