EXTRAIT"L'umbra passa senza fighjulà, ma puri vidi tuttu. Hè un' umbra chì hè sempri quì, chì cunnosci tutti i staghjoni schisuffreni di u locu, chì ni sà tutta a sustanza, è chì ni duventa unu spezia di riccitori. Hè fora, da un capu di notti à l'altru, è i sicreta bughji di 'ssu mondu quì, iddu i senti tutti.
Ùn ci hè un arrubbeghju di vittura ch'iddu ùn cunnoschi, ùn ci hè una stodia di culu ch'iddu ùn vica. Tutti i conci missi o ricivuti, n'hà intesu parlà. I cummircianti racchittati, l'assassinii a mani à l'alba, i minacci di a calata 'llu ghjornu, o ghjuvanetti sacrificati nantu à l'altari 'lla ninfumania, i sborgni trimendi è i snifferi di cucaina, i spidizioni scemi contru à i travaddadori imigrati, l'accidenti murtali di vittura à a cruciata di a burdata è di l'infernu, u sanguu è a risa svaculita, a risa è u sanguu... u so mondu è quì.
Senti tutti i moghja di l'addisperu umanu, 'ssi moghja trasfurmati in cumedia mattarasciata, in risa tùrbida. Sò colpa, insulti, ghjatimi, minacci, rifusi, còllari, liti, scaccanati bauli, canzoni di stuppina, urli di suffrenza, chjami."
VERSION FRANCAISE |
Nouveautés
mon caddie 
